मानार्थ उपाधि

Wednesday, July 6, 2011

पोहोर साल कामरेड केपी ओली सहितका एक टुकडीलाई मानार्थ विद्यावारिधी मिल्याथ्यो । सुनियाथ्यो कति दिन ‘डा. केपी ओली’ लेख्नु भो रे उहाँले । ग्रिनफोर्ड युनिभर्सिटीबाट प्राप्त विद्यावारिधी नक्कली भन्ने थाहा पाएसी उहाँसँगै विद्यावारिधी पाएका हास्य अभिनेता मदनकृष्ण श्रेष्ठ र हरिबंश आचार्यले माफी माग्नु भयो तर हास्य नेता केपी वलीज्यूले माफी माग्नु भएन । माग्नु पनि त किन हास्य अभिनेताहरुले त पर्दामा दर्शक हँसाउने हुन् । पर्दा पछाडि उहाँहरुको वास्तविक जीवन हुन्छ । वास्तविक जीवनमा इज्जत, प्रतिष्ठा, विवेक हुन्छ । र माफी माग्छन अब नेताको केस बेग्लै छ । उनीहरु पर्दामा दर्शक हँसाउदैननन्. । बरु वास्तविक जीवनमा दुनिया हँसाउछन् । नक्कली युनिभर्सिटीको नक्कली ड्रि्री लिएर दुनिया हँसाइएको छ । नेता भएसी कामै दुनिया हँसाउने छ भने किन माग्ने माफी दुनिया हँसाएकोमा ? आफ्नो दैनिक कामैमा माफी माग्न थाल्ने हो भने त लाइफै माफी मागेर बित्नेछ । यो पाटोलाई चाहि यहि निर छाडम् ।
झिना मसिना कुरा भन्दा मुल कुरा तर्फ मोडिउम अब । किनकि पीएचडी, ग्रिन फोर्ड, केपी ओली, माफी जस्ता कुरा अलि पुराना भइसकेका छन् । तर मानार्थ उपाधिको कुरा ऐलै पनि ताजै छ । मानार्थ उपाधि त्यस्तो उपाधि हो जुन सम्बन्धित क्षेत्रमा लन्ठुराम हर्लाई पनि दिइन्छ । कामरेड ओलीले पीएचडी पाउनु जस्तै ।
केही दिनअघि मात्रै ‘रातो र चन्द्र र्सुय’ नामक गितका र्सजकहरुलाई मानार्थ लप्टन (लेप्टिनेन्ट) उपाधि दियो नेपाली सेनाले । लु हेर्नोस त सेनामा एउटा सिपाई बन्न र कत्राकत्रा शारीरिक र बौधिक परिक्षा उत्तीणा गर्नुपर्छ । छाती नाप्न पर्छ, दौड्नु पर्छ, बन्दुक चलाउन जान्नु पर्छ । कसरत गरेर ज्यान बनाउनु पर्छ । पोका बोक्नु पर्छ । हाकिमको लात भेटनु पर्छ । खप्की खानुपर्छ तर गीत लेख्या भराँ हारमो नियम बजा’र लय निकाल्या भराँ र गित गाएकै भराँ सेकेन्ड लेफ्टीनेन्ट। फेरी सेनामा प्रवेशको लागि त उमेरको हदबन्दी पनि हुनु पर्ने हो क्यार तर ह्या त उमेरको कुरा छोडिदिम् सम्पूर्ण उमेर भुक्तान गरी परलोक पुगेर वर्षो पिन्ड ज्युनार गरिसकेका गोपालप्रसाद रिजाल पनि लेफ्टीनेन्ट । वाह क्या काइताको छ यो मानार्थ पदक ।
यो मानार्थको काइता पक्ष भनेको यो छ कि यो जसलाई पनि दिन सकिने । त्यसैले सुपरल्याठ हर्ले मानार्थ पिएचडी प्राप्त गर्न सक्छन् । खुट्टा नभएकाहरुले मानार्थ धावकको उपाधि पाउन सक्छन् । सिंह नभएको गोरुले मानार्थ तिखेको उपाधि पाउन सक्छ । डनहरु मानार्थ सन्त कहलिन सक्छन् । जड्याहाहरु मानार्थ पुरोहित बाजे हुन सक्छन् । व्यभिचारीहरु मानार्थ सदाचारी हुन्छ । दिनेको क्यै जाने हैन । दिनेले दिए भो लिनेले लिए भो । साच्चै गज्जपको छ मानार्थ उपाधि । यस्तैमा चोरहरुलाई मानार्थ प्रहरीको उपाधि दिन के बेर । मानार्थ उपाधि पदमा मात्रै होइन सम्बन्धमा पनि आयो भने के होला ? कुनै महिलाले कुनै पुरुषलाई मानार्थ पति घोषणा गर्लिन । कुनै पुरुषले कुनै महिलालाई मानार्थ पत्नी घोषणा गर्ला । कोही मानार्थ बाबु होला कोही मानार्थ आमा होलिन । त्यो भन्दा बढी प्रधानमन्त्रीका लाग मरिहत्ते गर्ने सबैलाई मानार्थ प्रधानमन्त्री बनाए कसो होला ? खैले खत्तम हुने थियो । नेपालमा यत्रो लोडसेडिङ भैरा बेला मानार्थ झिलिमिली बनाइदै हुने थियो । संविधान बन्न लास्टै गारो भै’रा छ यस्तौ कुनै कितापलाई मानार्थ संविधान भनिदिए के होला ?

Post a Comment
 

केही भन्नु छ ?

Name

Email *

Message *

चिर्बिराहट

धेरै पढिएका